سجين

وزى سجين
وبالطباشير
رسمت فصورتك الصافيه على قلبى
واعد سنينى فرحابك
واقول العمر لو عدى وأخرجلك
تهون الغربه والوحدة
يهون الذل والزنازين
يهون حبسى وانا مش عارف التهمه
ورغم انى لعمرى رفضت يوم الحبس
برج بيبان كانت بينا
فتفتحلى
وزى الليل
بيغتالوا النهار بالنور
انا شفتك
بتوب ابيض بتبتسمى
وبقعة دم ف المنديل
وسكينه ورا ضهرك
ساعتها بفوق
وبص لصورتك المرسومه فوق قلبى ودم كتيييييييييييييييير
وكام تعويرة بالطباشير
فبرجع سجنى واستسلم
وبرسم صورتك الصافيه
وبكتب تحتها ذكرى
غلطت كتير
وسبت العشق يخطفنى ويسلبنى براح روحى
وانا اللى زى كان الطير

موت بطل

مبروك
فؤادي اللي انجرح
قيدي الشموع للي دبح
غنّي كلامي وارقصي
لحن الوفا
كرباج لقلبي فاسمعي
قلبي الضعيف
سلّم راياتي واعترف
تاه الطريق
فاقد معالم رحلتي
زاد الهوى جوعَه وعطش
واللحظة دي
لما وصلت لمنتهى حلمي العنيد
ألقى سراب
سِكِن الغراب برج الحمام
مخدوع أنا
لو هاعترف ان الحصان اللي احتفلت بدخلته
ساب الدمار
والروح بوار
تبقى حقيقة مؤمنة
ذكر البلد هو اللي عاش
نسيت خلاص كل القصص
اللي خدع
واللي اتخدع عايش خلود
مش راح يموت
حتى الحصان اصبح كمان رمز الهوى
علشان عشانه سَلّمت كل المدن
فرقين كبار بينِك وبين الملحمة
لا الحب كان بيحركِك فتسافري فيّا
ولا موت بطل كان يألمِك
كل اللي همِك
ان المدينة يوم تقع
وِقِع البطل
سهم الخداع سمو العفي
كانُو القضا
ياعمر عمري اللي انقضى
فات الأوان للفضفضة
فاوعي الامي تشغِلِك
وتحسّي مرّه باللي علّق دمعته
رهن الوفا
فاتباع جفا
اوعي الدموع دي تشغلك
واما تحسّي فرحتك
قيدي الشموع
غنّي كلامي
ارقصي
لحن الوفا
كرباج لقلبي .. رددّي